Translate

29 يناير 2011

من قصائد أحمد فؤاد نجم سنة 1977

بيان هام
هنا شقلبان
محطة اذاعة حلاوة زمان
من القاهرة ومن كردفان
وسائر بلاد العرب واليابان
ومن فنزويلا أيضا ايران
ومن اى دار
أو بلد مستباحه
بفعل السياحه مع الأمريكان
هنا شقلبان
محطة اذاعة حلاوة زمان
نقدم اليكم بكل اللغات
مراسح وسيما وجميع الفنون
صحافه ومنابر وتلفزويونات
وخطبا ف جوامع وجبنه وزيتون
ونقزح ونركب جميع الموجات
ونبحث ونفهم فى كل الشئون
ودايما نلعلع فى كل الحالات
ولا حد سامع ولا يحزنون
وتسمع ما تسمع دا ما يهمناش
لأن احنا اصلا بناكل بلاش
فخليك فى نفسك وما تخليناش
نسلط عليك القلم واللسان
هنا شقلبان
محطة اذاعة حلاوة زمان
يسر الذاعه ولا يسركوش
بهذى المناسبه ولا بندعيكوش
نقدم اليكم شحاته المعسل
وبدون الرتوش
شبندر سماسرة بلاد العمار
معمر جراسن للعب القمار
وخارب مزارع و تاجر خضار
وعقبال أملتك أمير الجيوش
ما تقدرش تنكر
تقول ما اعرفوش
ما تقدرش ايضا تفول ما أسمعوش
شحاته المعسل حبيب القلوب
يزيل البقع ولاهموم والكروب
يأنفس يأفين يبلبع حبوب
ويفضل يهلفط ولا تفهموش
وتفهم ما تفهم دا ما يهمناش
لأن انت فاهم وعامل طناش
ح تنكر وتحلف ح اقول لك بلاش
ح تتعب دماغنا وتتعب كمان
هنا شقلبان
محطة اذاعة حلاوة زمان
لأن المخبى ظهر واستبان
وكل المسائل بدت للعيان
وطلعت حكاوى ونزلت كمان
عن التهريبه وعن كيت وكان
وعن محسوبيه وعن ألعبان ( بضم الالف)
ظهر فى المدينه كأن الطوفان
وغرق مراكب وسوح غيطان
وبعض المراكب ح تغرق كمان
وأزمة مساكن وأزمة أمان
وعالم بياكل فى عالم جعان
وريحة مؤمره فى جو المكان
مخطط خيانه مع الأمريكان
لدبح العشيره وحرق المكان
وفيه ناس بترغى ولازم بيان
كما ابلغونا جميع الودان
لهذا وذاكا وتلكم كمان
نقدم اليكم عروسه وحصان
شحاته المعسل وهذا البيان
هنا شقلبان
محطة اذاعة حلاوة زمان
بسم الله
سلام عليكم وسلمون وموز
وأما المسائل فهنجف ولوز
فيا اخوتى ويا أخوات
اليكم بيانى كما هو آت
جميع المسائل تمام التمام
وكل الكلام دا مجرد كلام
فصبرا جميلا ولا تقلقوش
وشغل الضغاين أنا ما أقبلوش
ما فيش أى حاجه
على الطلاق والعتاق بالتلاته
ما فيه اى حاجه
وقدر كمان ان فيه أى حاجه
ما لوش أى لازمه الكلام واللجاجه
وعيب ان عيل يسوق السماجه
ويعمل لى باللو ويعمل ديباجه
آنا بطبعى ضد السماسره الكبار
بحكم المنافسه وحكم الجوار
لكن مش فى طبعى
انى أعمل فضيحه
لواحد زميلى هبش كام صفيحه
ما كل الزمايل بتهبش صفايح
وكل اللى جاى مش زى اللى رايح
فيا ايها الشعب صهين تفلعص
مساء التنفس مساء الروايح
أخويا الامير بزرميط الايرانى
بعت لى السنه دى
عزمنى ودعانى وأنا قبلت طبعا
ورحنا العزومه وكانت وليمه
ما تحصلش تانى دا أيه المحمر
وأيه المكمر وايه المشمر
وايه الصوانى
وانا دماغى تعبت ولفت صراحه
من الفخفخه والهنا الاصفهانى
هناك يعنى مثلا اذا شربت طافيه
تمز بكوارع وبسطرمه ضانى
ما شفتش هناك
ناس بتحقد عليهم
ولا ناس بتشتم فلان الفلانى
لأنه اشترى عزبتين من شطارته
وحكمة ادارته وطلع مبانى
وبعد الوليمه استلمنا الهدايا
مفضض ومدهب وقز وقيشانى
وطبعا أخويا الأمير قال لى حاجه
ح اقولهالكو طبعا اذا الوقت ناسب
ح يطلع لى عيل بدون اى حاجه
ويعمل لى فلحس ويقعد يحاسب
دا حقد اشتراكى أنا ما أقبلوش
ولو هو ابنى أنا ما اعتقوش
كلام عن سماسره كلام عن دعاره
حاجات مش صحيحه جمل مستعاره
وعايزين يخلوا البلد اردغانه
وعايزنى اسيب البلد من زمان
وأنا مش ح اسلم واسيب الأمان
ولا بالبوليس والنيابه كمان
فيا ايها الشعب كمل جميلك
وصبرا واذلم حتيجى المصارى
وتاكل وتشرب تبع ما يآتيلك
وتغرق فى بحر العبيد والجوارى
وترسم حياتك حسب ما يرائيلك
ونملا الحوارى فساقى وقصارى
تسبح بحمدك وتشكر جميلك
وفضل الزباله وطفح المجارى
ختاما سلاما وآخر كلاما
ضرورا
يسود الهدوء والوئام فماذا والا
ح طربقها واللا اهرب فلوسى
واسافر قواما سلام عليكم
وسلمون وموز بصفتى رئيسا
وابا وجوز
القاهرة /1977

نادي السينيما

*
*
أجب عن الأسئلة التالية بعد مشاهدة الفيلم ,و أعرب ما ليس تحته خط.
ما هي الأخطاء القاتلة لعتريس؟
لماذا زوج مفتي الدهاشنة فؤادة بلا توكيل؟
كيف تري فؤادة العفيفة بالمقارنة لمن تبذلن عاريات الصدور علي إفيشات الدهاشنة
ينشرون الانحراف و الرذيلة باسم الفنون و الجنون؟
هل كان إغلاق الهويس و شفط الخيرات سببا في غضب الدهاشنة؟
هل أجج الموقف مقتل محمود و سحله و سحبه بعد هرسه بالعصي ؟
هل كره الناس عتريس لانحرافات رجاله مع بياعة الزبدة و صديقاتها؟
هل تحب فؤادة من روحك و تفتديها بالعزيز الأكرم؟
هل يبارك الله فيمن سرقوا الدهاشنة و أهلكوا الحرث و النسل؟
لماذا تخلي المستشارين عن عتريس بعد توريطه؟
من الذي أغلق الباب بالسلسلة علي عتريس؟

15 يناير 2011

إذا الشعب يوما أراد الحياة فلابد أن يستجيب القدر


الطاغية: أنا مش بابا و ماماالشعب: و احنا مش عبيد
الطاغية: أجيب لكم منين
الشعب: هات اللي خده نسايبك
الطاغية: بحبكم
الشعب: كداب
الطاغية: وطني فداك دمي
الشعب : طيب ما تتمرغ في ترابه لما لم تمت دونه
الطاغية: سوف أعطيكم
الشعب: نحن من أعطيناك و أنت حارس مقدراتنا
الطاغية: سأعطيكم و ألتفت الي ابنائكم كما أعطيت ابنائي
الشعب: فات الميعاد
زيارة لمحمد بوعزيزي قبل موته
و هو خريج الجامعة الذي حرق نفسه
بعد مصادرة عربة الخضار التي كان يسترزق منها
و لكن بعد فوات الأوان
و السؤال عربة الخضار تصادر ليه؟؟
طبعا مش عاوزة نباهة
هو حيبيع بسعر زهيد
طيب و السوبر ماركو بتاع اسمه ايه يبيع غالي لمين؟؟؟
يلا
انت صادرت عربة الخضار و الشعب صادر السوبر ماركو
خالصين و الحساب الشديد عند رب العالمين
و بالمناسبة الدول الجميلة بتخلي المواطنين مساهمين في السوبر ماركو و لهم ارباح
ربنا يجعل بيوت المحسنين عمار


خطبة : أنا مش مصدق مش معقول
خطبة : خلاص أنا فهمت
(ما قبل الباي باي)