سألني فسألته

سأل مستنكرا و زاما شفايفه الملظلظة

من هو الشهيد؟؟

فسألته

و من هو اللص
و من هو خائن الأمانة
و من هو الفاجر
و ما معني العهر و نشر الرذيلة
و يعني ايه حرية
و يعني ايه خبز و سكن و أمان
و يعني ايه شباب ضاع
و يعني ايه الحلم ببكرة راح
و يعني ايه تقوي و ربنا شايفك و ممكن ينتقم
و يعني ايه أم و يعني ايه حضن و يعني ايه وطن
و يعني ايه فساد و يعني ايه تعريص
و يعني ايه قهر و يعني ايه كبت و يعني ايه غربة

و يعني ايه فقر و يعني ايه جهل
ويعني ايه سرطان و كبد وبائي
و يعني ايه مجاري و يعني ايه ماء ملوث
و يعني ايه سجن و يعني ايه منفاخ
و يعني ايه ناس عواجيز تموت في جحور
و يعني ايه ناس في الزفة تطلق البخور
و يعني ايه نصر و يعني ايه كرامة
يعني ايه أه ه ه ه ه ه ه ه ه ه ه ه ه ه و دمعة من عين راجل مقهور

يعني ايه تزرع و ابن طنت يحصد
يعني ايه أخر موضة و يعني ايه عشرة في أوضة
يعني ايه شرف و يعني ايه أمانة و يعني ايه اهانة و يعني ايه
ندالة و يعني ايه تناحة و يعني ايه بجاحة

و يعني ايه عبارات تغرق و يعني ايه قطارات تحرق

و يعني ايه شاب يقتل و يعني ايه شاب غرق قبل ايطاليا

و يعني ايه مكافأت و يعني ايه كفاءات

و يعني ايه هجرة و يعني ايه مرمطة

يعني ايه زبالة و يعني ايه سحابة سودة و يعني ايه بيوت تقع و يعني ايه رشاوي

و يعني ايه تقاوي و يعني ايه سماد و يعني ايه فساد

و يعني ايه هانص و يعني ايه دانص و يعني ايه اللي يتلسع من الدقي

ينفخ في المعادي و يعني ايه عريانة و يعني ايه فنانة و يعني ايه

باحبك و يعني ايه تغريب و يعني ايه هيرويين

و يعني ايه بلطجية و يعني ايه مرشدين و يعني ايه متخلفوش

و يعني ايه انتم متسرقوش

و يعني ايه غضب و يعني ايه قرف و يعني ايه احتقان و يعني ايه غليان

و يعني ايه عصيان و يعني ايه طناش و يعني ايه طوارئ

و يعني ايه عيال و يعني ايه بيتسلوا و يعني ايه ابويا و يعني ايه اخويا

و يعني ايه تلفاز و يعني ايه غسيل مخ و يعني ايه غسيل أموال

يعني ايه اغاني شبابية و يعني ايه افلام خلاعية

يعني ايه مستشفيات استثمارية و يعني ايه دروس خصوصية

يعني ايه موت و يعني ايه قبور و يعني ايه حساب و يعني ايه قيامة

و يعني ايه جنة و يعني ايه نار و يعني ايه الواحد القهار
و يعني ايه و يعني ايه
جاوبني و انا اجاوبك

لأنك لوعرفت كل ده حتعرف من هو الشهيد

الشهيد اختاره ربه لنقائه و حربه للبغي
شايف وشك اصفر
و لا أقولك أسأل الله أن يعطيك إجابة سريعة