زمن الهوبصة

كنت و انا صغير

اسمع كلمة بيهوبص

تكررها جدتي رحمها الله و كنت اضحك بيني و بين نفسي..ايه بيهوبص دي؟؟؟؟

و مرت الايام ..و السنين.. و فجأة قفزت الكلمة الي ذهني بإلحاح

فقد شاء الله ان تتكرر معانيها امامي بسرعة خلال يومين

المشهد الأول: ليل داخلي داخل بنك ما

اهلا اهلا يا باشا

شرفت

اهلا بيكم

اريد استلام بطاقة الائتمان

اتفضل

استلمت و وضعت البطاقة بحافظتي و خرجت

بعد ساعات اخرجت البطاقة لمعاملة

و الحمد لله رأيت ان اسمي الأول مطابق-بينما باقي الاسم لغيري

وربنا ستر و الا كنت صرفت علي حساب انسان اخر

و عدت في اليوم الاخر و تداركنا الأمر

عرفت ليه عملوا كده؟؟ الموظفة كانت بتهوبص

المشهد الثاني: نهار داخلي

اجدد معاملة جواز سفر لابنتي

اهلا

هل لديك الاوراق المطلوبة

نعم

طوابع

نعم

و انتهينا و جلست اراجع الموضوع

كاتبين الوظيفة ربة بيت

رغم اعطاؤهم شهادة من الكلية

و أعدنا اصلاح الموضوع

عرفت ليه عملوا كده؟؟ الموظف كان بيهوبص

المشهد الثالث:

نهار خارجي

في الطريق للمطار

اتصلنا علي الاستعلامات

الطائرة تهبط 11 صباحا

وصلنا للمطار

وجدنا تأخير 4 ساعات

اعدنا الاتصال بالاستعلامات

نفس الرسالة

تهبط 11 صباحا رغم ان الساعة 12 ظهرا

عرفت ليه عملوا كده؟؟ الموظفين كانت بتهوبص

المشهد الرابع

زيارة عائلية

و دار الحديث عن الطيران

ففوجئنا بأحد الحاضرين يقول ان ابن خالته طيار قدير

رفض الألمان السماح له بالطيران بطائرته لوجود تسرب بالزيت

الا انه رفض ووقع علي مسئوليته

ووصل بالسلامة..و مما قهرني تعقيبه.. شفتوا الألمان و قلة خبرتهم

!!! بيهوبص هو و ابن خالته

هل تريد المعني الحرفي لكلمة بيهوبص في القاموس الخاص بي:

هي عمل عشوائي لموظف عام منوط به خدمة عامة - لم يراعي فيه الأصول المرعية و سياسة العمل مما يؤدي الي ارهاق الناس و انهيار المجتمعات و زيادة احتمالات الكوارث وما ينتج عنها من مأسي و احباطات..............

و الأمثلة كثيرة

طبيب نسي فوطة في بطن المريض

السسترات بتهوبص

لماذا؟؟ لأن الاجراء المتبع ان الفوط يتم عدها من السستر المساعدة الي السستر المناولة بداية و نهاية عند كل عملية!!!!

جندي بيضرب مدفع مضربش (مصدي)

بيهوبص

لماذا؟؟

لأن الاجراء المتبع هو تنظيف الماسورة و تزييتها و اجراء مناورات حتي وقت السلم

عربية محملة خشب - اطنان مطننة فوق حمولتها و فكت الحمولة علي الطريق مما ادي لوفاة 15 و اصابة 50

السواق بيهوبص

شايل فوق حمولته

و لم يدخل علي الميزان الموجود عند بداية كل طريق- أو دخل و مشي حاله

اللهم قنا شر كل مهوبص و شاري دماغه

و خلص مجتمعاتنا منهم

و الغريبة ان هما هما دول اللي في كل قاعدة ينجعصوا و يقولوا لك : في اوروبا و الدول المتقدمة..

هوا بوظ امورنا الا جماعة مهوبص ....لأ و واقعة سودا لو مهوبص و كمان بيضبش....

اللهم الهمنا الاخلاص الذي هو حياة القلوب

و ملح الحياة و فلفلها و عسلها و سكرها

و السؤال الأن هل من الممكن ان تتقدم المجتمعات و فيها أعضاء من هذه التنظيمات المجرمة:

تنظيم مهوبص

و تنظيم بيضبش

و بتوع معلهش

و جماعة بكرة

و عصابة: هو انت الي حتصلح الكون يا سيد؟

وبتوع مشي حالك و جربتها و نفعت

و في أحد المرات قال لي واحد خواجه شكله كان هاربان من السبتية
:إنتم العرب بتوع ال IBM
و افتكرته بيمدح معرفتنا بالكومبيوتر
فضحك قائلا لأ مش الكومبيوتر
I=إن شاء الله
B=بكرة
M=معلهش
بيتريق علينا حضرته و جاي من بلده حافظ !!!!!!!

لكن يعني ايه يهوبص من وجهة نظرك